قالقني زيي زي كتير غيري الأزمة اللي احنا فيها دلوقتي
أزمة ان في احتمال كبير جدا ييجي بعد سنة ونص من الثورة على نظام
كائن (مش قادرة أطلق عليه كلمة انسان) من نفس النظام وبيعتبر مبارك اللي ثورنا عليه مثل أعلى ليه
كائن كان منصبه رئيس وزراء يوم موقعة الجمل
فاكرها ؟؟!!
اللي مات فيها اخوك واختك ... مات فيها ابنك وبنتك ... مات فيها والدك ووالدتك
طبعا مش محتاجة أفكرك بقى بالانجازات العظيمة بتاعت مثله الأعلى
زي عبارة السلام والقطر اللي اتحرق والعمارات اللي وقعت والسرطان والكبد الوبائي والأكل الملوث وملايين ماتوا من التعذيب في السجون
.......................................................
حاسس ان الصورة سودة أوي ؟؟
طيب ارجع معايا بالزمن كده لوراء من سنة ونص وممكن تزود شوية لغاية بداية 2011
فاكر أما بدأنا السنة دي بأحداث كنيسة القديسين ؟؟
دي كانت عندنا في مصر لو عديت كده الحدود الغربية هتلاقي ليبيا كمل كمان شوية هتلاقي تونس
فاكر شاب اسمه البوعزيزي ؟؟ فاكر أما الناس كلها نزلت الشوارع ؟؟
فاكر أما النظام اللي بيحاول يرجع كان بيقول مصر ليست تونس ؟؟
فاكر أول ما بدأت الناس تعمل شير لايفينت الثورة واتفقوا ينزلوا يوم 25 يناير
أنا شخصيا مكنتش مصدقة ان حاجة هتحصل متخيلتش ان الناس هتنزل أصلا
بالكتير قلت هيعملوا شوية مظاهرات ويرجعوا تاني
كنت أنا بره مصر وكان عندنا امتحانات الترم الأول
رجعت من الامتحان فتحت التلفيزيون ملقتش حاجة
فقدت الأمل أكتر
دخلت نمت عشان أبقى أصحى أذاكر
لما صحيت قلت أبص مرة أخيرة كده يمكن حتى يكون في مظاهرات ولا حاجة
كان نوعا ما الميدان فيه ناس جالي شوية أمل بس قلت أكيد هيرجعوا بالليل
بعد يومين بدأت الناس ترجع والميدان فضي خالص
طبعا المثل الأعلى (مبارك) طلع علينا بكام خطاب كده دايما متأخر عن المطالب
بس سيبنا منهم أنا مش بوثق للحدث أنا بس عايزياك تفتكر معايا
حصلت طبعا موقعة الجمل بدأت الناس تنزل واعتصموا بقى في الميدان 18 يوم
بدأ الأمل جوايا يزداد كل يوم يقضوه في الميدان الأمل يزداد جوايا أكتر
أجازة نص السنة قربت تخلص ولسه معتصمين ..قبل ما تخلص الأجازة بيومين
بدأت الأنباء عن تنحي مبارك وكله خلاص مستعد انه هيتنحى ونخلص
طلع الخطاب الأخير ليه اللي جاب للكل احباط رهيب
كنت حاسة ان قلبي هيقف بعد ما كنت مستنية التنحي وهطير من الفرحة
تاني يوم على طول وكان آخر يوم في الأجازة كان التنحي
طبعا الفرحة مش ممكن تتوصف والأمل في مستقبل أفضل للبلد ولأهلها كان عالي
كنت متخيلة اننا كده خلاص كله يروح و6 شهور وييجي رئيس ونبقى دولة بجد
ماما ساعتها قالتلي فترة البناء أصعب بس مكنتش متخيلة صعوبة الموضوع
دلوقتي بعد مرور سنة ونص دلوقتي اتأكدت اننا لسه في بداية الطريق
الثورة انجاز عظيم متخليش حد يخدعك بأي كلام تاني
آه خدنا ضربات وبنقع لكن المهم اننا بنقوم تاني
كسر حاجز الخوف ده مش شيء قليل
لما يبقى عندك جيل الشباب وكل اللي طالع بعديهم
عرف ان البلد دي بتعته وعرف انه ميبألش الا انه يعيش حر
لما عرفنا كل واحد على حقيقته مين وطني فعلا ومين حزب وطني وجربنا انتخابات حتى لو حسينا انها مش نزيهة
بس كل واحد اتعلم حاجة أو أكتر منها
اللي عايزة أقوله بعد ما زهقتك ومش عارفة اذا كنت توهت مني
ولا لسه معايا عالخط
اننا في الأول ومفيش بلد بتتبني بالساهل
في ناس ضحت -ربنا يتقبلهم من الشهداء - ولسه في أضعافهم هيضحوا
مش بس بدم لكن بعرق ومجهود
أهم حاجة يفضل عندنا أمل وايمان بربنا انه معانا طول ما احنا عالحق
نقلق آه ... نخاف آه ... نقع آه
أهم حاجة لازم بعد كده نقوم ومهما وقعنا نبدأ تاني
مهما قابلنا مطبات نعديها ومهما أحلام لينا ضاعت
نحارب ونحقق غيرها
مش هنخسر بجد الا لما نفقد الأمل
والثورة مستمرة لغاية لما احنا نقول انها وقفت
ومش هيوقفها باذن الله لا محاولة النظام انه يقضي عليها
ولا ملل الأجيال العجوزة المتكلسة منها
لازم نفسنا يكون طويل ونحارب عشان أحلامنا لنفسنا ولأهلنا ولبلدنا
احنا لسه في أول الطريق ومكملييييييييييييييييين باذن الله
^ــــــــــــــ^ ^ــــــــــــــ^ ^ـــــــــــــ^
المتكلسة دي بتاعت ابو الفتوح :))
ردحذفهههههههههههههههههه ما أنا عارفة انها بتاعت أبوالفتوح :)) وأكيد كل اللي هيقرأها هيعرف انها بتعته يعني :)) وبعدين زي ما هو واضح للكل فأبوالفتوح أستاذي ومفيش مشكلة لما أقتبس من كلامه :))
حذفاكيد طبعا :))
ردحذف