مع من أقف ؟

مع من أنت ؟
ان الاجابة على مثل هذا السؤال صعب ، ولكن حين تجد طرفا كالذي أقف معه
لا تملك الا أن تختاره دون لحظة تردد
..................









..................

أقف مع من حلقت روحي معهم حينما وقفوا كتفا الى كتف في ميدان التحرير
أقف مع أول من نزلوا و هتفوا باسقاط مبارك ونظامه
أقف مع من هتفوا "عيش .. حرية .. عدالة اجتماعية"
أقف مع الجنود المجهولين الذين يعملون في صمت ويرحلون في صمت
أقف مع من فقدوا بصرهم لكن لم يفقدوا بصيرتهم
أقف مع من تحول جسده الى مصفاة مما تلقاه من "خرطوش" ورصاص
أقف مع أبطال الـ18يوم وشارع عيون الحرية ومجلس الوزراء
أقف مع "ست البنات" التي أظهرت أن ما عندنا في مصر هم ذكور لا رجال
أقف مع من حرك الماء الراكد وزلزل عروش الطغيان
أقف مع من يدرك أننا قمنا بثورة لنصبح من الدول الرائدة لا لكي نظل في اختيار ما بين السيء والأسوأ
أقف مع المجانين الذين يحلمون بغد أفضل والذين يعملون من أجل ذلك

أقف مع من سيحمي ظهري .. مع من يقاتلون بجانبي لأجل حلمنا ..
مع من سيحاربون لاستعادة حقي .. مع من سيكملون الطريق ان لحقت بالشهداء ..

مع من لم يخونوا ولم يكذبوا .. مع من ينزلون بأنفسهم للأرض لا يرسلون صبيانهم ..

مع من أصيبوا ومن ماتوا .. مع الهاتفين للحرية .. مع الهاتفين لأجل مصر

يا فلوووووول !!

واضح ان مر عالثورة وقت كان كفيل 

بان البعض ينسى أو يتناسى مين هم الثوار

المشكلة ان النسيان دلوقتي

هيؤدي للتزوير في التاريخ

اللي كده كده بيتزور فتخيل لما يبقى بدل التزوير اتنين

السنتين اللي عدوا من عمر الثورة كانوا مليانين أحداث

لفت دماغ الناس كلها

فخلت الثوار فلول والفلول ثوار 

وأصبحت كلمة "فلول" دلوقتي زي كلمة "اخوان" قبل الثورة

اتهام لأي واحد معارض للنظام

رغم ان النظام نفسه ايده في ايد الفلول عادي جدا

ومعينهم في الشورى وبيستشهد بكلامهم في الجريدة بتعته

وكمان بقت كلمة "فلول" شماعة لفشل السلطة

زي ما كان الاخوان شماعة لفشل السلطة قبل الثورة

اقرأ يا سيدي -بدل شوف-

يوم 25 يناير فيه مجموعة ناس نزلوا مسيرات متجهين لميادين التحرير

(حلوة ميادين التحرير دي)

الاخوان قالوا مش نازلين

بس فيه منهم ناس نزلت بصفة شخصية

والكنيسة قالت مش نازلة

بس فيه مسيحيين نزلوا برضو

يعني باختصار كل اللي نزل اسمهم

مصريين

نيجي بقى لمين هم الفلول ؟

الفلول -من وجهة نظري- هم اللي كانوا ضد

"عيش ،، حرية ،، عدالة اجتماعية"

سواء اللي قالوا بلسانهم انهم ضدها

أو قالت أفعالهم أنهم ضدها
مثلا :
نقول "عيش" .. ترفع انت الأسعار
نقول "حرية" .. تترفع قضايا بتهمة اهانة الرئيس
نقول "عدالة اجتماعية" .. نلاقي ان الفقراء بيزدادوا فقرا والأغنياء بيزدادوا غنى

وعلى فكرة مش معنى ان ناس تبعك شاركوا في الثورة تبقى انت صاحبها

ومش معنى ان ناس تبعك شاركوا في الثورة يبقى انت كده مبقتش فلول

ما هو لما حضرتك تبقى

 "المرشح الاسلامي الوحيد" aka "مرشح الثورة" (في الجولة التانية)

وتيجي في السلطة

فتكرم أعوان مبارك

ومتجبش حق اللي قتلهم مبارك

بل وقتلت ناس زي مبارك

وبتقترض زي مبارك

وبتكذب زي مبارك

ومؤيديك زي مؤيدي مبارك

تبقى ما انت الا

وجه ملتحي لمبارك

ولا طبقت الاسلام اللي انت كنت مرشحه -حسب كلام أنصارك-

ولا حققت مطالب الثورة اللي تم التسويق ليك على انك مرشحها قصاد مرشح النظام

يا فلوووول !!

أجمل الكلمات

أجمل الكلمات هي ..


هي كلمة لمست جرحا فشفته
هي كلمة مسحت دمعة ورسمت بسمة
هي كلمة انتزعت ضحكة من بين الآلام


هي كلمة أنبت ضميرا فأيقظته
هي كلمة أزالت غشاوة عن العين فأبصرت
هي كلمة عتاب أبكت 


هي كلمة واست انسان في حزنه
هي كلمة باركت لشخص في فرحته
هي كلمة دعت بالخير لكل من أحبت


هي كلمة رأت مظلوما فنصرته
هي كلمة رأت خطأ فصوبته
هي كلمة صدعت بالحق ولم تبالي

هي كلمة أعطت أملا وسط اليأس
هي كلمة أضاءت شمعة وسط العتمة
هي كلمة أعطت دفعة للأمام

أجمل الكلمات هي
الكلمات المبعثرة على الورقة
التي تكتبها لنفسك قبل أن تكون لغيرك
التي تكتبها 
بكل تلقائية، بكل صدق، بكل حب

ده أنا ليا فيها النيل

"انت ليه شادة حيلك على مرسي"

"هو كله معارضة معارضة كده .. هو الراجل معملش حاجة حلوة"

"ادوله فرصة"

أكيد كلنا تعاملنا مع الكلام ده

لو حضرتك واقف في الصف جنبي

يبقى أكيد الكلام ده اتقالك

أما لو حضرتك واقف الناحية التانية

يبقى انت اللي بتقوله

...............

أنا مش هتكلم عن اللي بيقولوه

لأني لا أمت ليهم بصلة ولا أعبر عنهم

ومش هتكلم برضو عن كل اللي بيتقالهم 

لأني برضو لا أعبر عنهم كلهم

ببساطة هتكلم عن نفسي

...............

صدقني التأييد مفيش أسهل منه

ما هو مين يعني اللي ميحبش يريح دماغه

وأهو ميفكرش وبيعلن موافقته وخلاص

بس المشكلة ان

"ليا فيها النيل .. وليها فيا الروح"

.............

ياما سألت نفسي 

ليه الناس سكتت الفترة دي كلها ؟

ليه يسلمونا البلد خرابة ؟

ليه كل جيل يسلمها للجيل اللي بعديه أسوأ مما استلمها ؟

عشان كده بعارض

بعارض عشان البلد دي تستاهل كل خير

عشان أنا وجيلي واللي قبلينا واللي بعدينا نستاهل حياة أفضل

عشان البلد أمانة في رقبتنا

ان مكناش نسلمها للي جايين أحسن عالأقل منسلمهاش أسوأ

وده مش فضل مننا ، لأ ده واجبنا

عشان فيه ناس ماتت واللي ماتت عشانه لسه متحققش

عشان محدش بعد 20 سنة يسأل نفسه هم سكتوا ليه

هم ضيعوا البلد وضيعونا من بعدهم ليه

..............

وحتى لو لوحدي ومليش وزن

فكفاية ان الواحد يكون كلامه ولو شكة دبوس

تحرص على ان الضمائر متنامش مرتاحة

لحظات ميلاد

أن تشهد لحظة ميلاد ..

انسان

حلم

أمل

أو أي شيء آخر هو بالتأكيد أمر ساحر

............

أن تقرأ محاولات شعرية لأحدهم .. فتشهد لحظة ميلاد شاعر

أن تقرأ قصة قصيرة لاحداهن .. فتشهد لحظة ميلاد روائية

أن تقرأ مقال في مدونة ما .. فتشهد لحظة ميلاد صحفي أو كاتب

أن تقرأ نكتة أو "ألشة" وتضحك .. فتشهد لحظة ميلاد فنان

...........

أن أقرأ تعليق على مقال قمت بكتابته

أن أرى عدد مشاهدات مدونتي يزداد يوما بعد يوم

أن أشاهد صور تأسيس حزب مصر القوية

فأشهد لحظات ميلاد حلمي

..........

أن ترى انطلاق مسيرة .. فتشهد لحظة ميلاد ثورة

أن تسمع هتاف الشعب يريد .. فتشهد لحظة ميلاد 90 مليون

أن ترى سقوط أول نقطة دم في الشارع .. فتشهد لحظة ميلاد الحرية

أن تعلم باطلاق أول رصاصة وسقوط أول شهيد .. فتشهد لحظة ميلاد الكرامة

..........

كثير من لحظات حياتنا هي لحظات ميلاد

تبدأ بأشياء صغيرة ثم تكبر لتصبح أمرا عظيما

تكبر لتصبح ..

انسان .. ناجح في مجاله

أو

حلم .. تعيش لتحقيقه

أو

أمل .. يبث فيك الهمة لاكمال الطريق

بين الماضي والحاضر والمستقبل

 في الماضي .. عظماء

في الحاضر .. متخلفون

في المستقبل .. الله أعلم

"الماضي"

يحلو للبعض أن يوقف الزمن ويغلق عليه الباب، فلا يعي الا الماضي، يتفاخر به ويتباكى عليه.

لا يرى به أية عيوب ويرفض مجرد أن تلمح له أن أجدادنا كانوا بشر يخطئون.

وعلى الجانب الآخر تجد من يرى التاريخ أسود وأنه ليس به ما يستحق الفخر والكل مخدوع ولا يعلم حقيقة التاريخ ويقول أن الاهتمام بالحاضر أولى

"الحاضر"

نتفق جميعا على أنه سيء

لكن عند الفعل نختلف

هناك البعض يفضل الانزواء في ركن للبكاء

والبعض يندفع للعمل دون أخذ وقت كاف للتخطيط

"المستقبل"

لا نعلم كيف سيكون

فهو في النهاية يعتمد على ما سنفعله في الحاضر

هناك الواهمون الذين يتخيلون مستقبلا ورديا 

وهناك المتشائمون الذين لا يتوقعون أي خير في المستقبل

يا سادة ،،

الماضي ليس ورديا وليس أسود

فيه ما هو حسن وما هو سيء

افخر بالحسن ولكن لا تكتف به فقط

وتعلم من السيء ولا تعممه على كل التاريخ

أما الحاضر فالبكاء عليه لن يغيره

والاندفاع دون تخطيط لن يقودنا الا للفشل

فلنتأنى دون أن "ننام في الخط"

ولنعمل بسرعة دون استعجال

بالنسبة للمستقبل فهو يتوقف على ما سنفعله

كن متفائلا لا واهم

وكن واقعيا لا متشائم

تعلم من الماضي واعمل في الحاضر لتبني مستقبل مشرق