قرأت من كذا يوم على تويتر
" احنا عاملين زي اللي عنده بيت مهدوم وقاعد يتخانق على طريقة مسح السلم "
.........................................
الشاعر عبدالرحمن يوسف كتب اليوم مقالة
احتمال تكون قرأتها أو مقرأتهاش
ممكن تختلف أو تتفق معاه في الرأي
مش هيفرق معايا
..................................................
هو احنا عندنا في مصر كام بهائي وكام بوذي
يا عيني مضطهدين ومش عارفين يكتبوا ديانتهم في البطاقة ؟؟!!
آه كل انسان مهم بس متوجدليش في بلد مليانة كوارث مشكلة من الهوا
...........
في المقابل عندنا كام مصري عايشين في المقابر والعشوائيات ؟؟
كام مصري بياكل من الزبالة ؟؟ كام مصري مش لاقي يتعالج ؟؟
كام مصري عايش في جو ملوث سواء المياه ولا الهواء ولا الفكر ؟؟
كام مصري مش لاقي يتعلم ؟؟ واللي لاقي يتعلم مش لاقي تعليم عدل
..................................................
مش قضيتي مدى اتفاقك أو اختلافك مع رأي الشاعر
مش قضيتي هتصنفني كفاشية ولا رجعية ولا .. ولا ... بعد ما تقرأ ده
.....................................................
أنا قضيتي أيها القارئ/ة الفاضل/ة
الناس اللي عايشة في العشوائيات سواء المسلم أو المسيحي أو أي دين آخر
الناس اللي بتموت كل يوم من السرطان والكبد الوبائي وكل الأمراض دي
المسلم منها والمسيحي أو معتنق أي دين آخر
الحوادث اللي بتحصل والناس اللي بتتعطل عن أشغالها كل يوم بسبب زحمة المرور
ودول منهم المسلم والمسيحي والملحد وصاحب أي ديانة أخرى
قضيتي تعليم فاشل للمسلم والمسيحي وغيرهما اللي مخليانا مش مستحملين بعض
وأي حد فينا يقول رأي مش عاجبنا يبقى نشتمه هو وأهله ودينه
قضيتي هي كل الكوارث والمصائب اللي متراكمة بقالها سنين
كل الكوارث والمصائب اللي مفيش اتنين فينا يختلفوا على انها لازم تتحل
ولازم كلنا نخلص منها عشان كلنا نعرف نعيش
عشان المسلم والمسيحي والبوذي والبهائي وغيرهم يعرفوا يعيشوا
أنا قضيتي
أحل مشاكل المصريين وغالبا المشاكل اللي تخص طائفة معينة هتتحل
أنا قضيتي
أبني البيت وبعدين أشوف أمسح السلم ازاي
