اللجنة التأسيسية لدستور مصر

بسم الله الرحمن الرحيم

لا يخفى على أي حد فينا الجدل الدائر حول لجنة المئة اللي اختارها البرلمان لوضع الدستور

أصبحت اللجنة التأسيسية هي محور الحديث في البرامج وتويتر وفيس بوك

طبعا آراء الناس حول الشخصيات التي تم اختيارها منقسمة

فيه اللي مؤيد ليها كما هي وفيه اللي شايف انها لم تمثل جميع الطوائف 

أو انها لم تستند الى معيار الكفاءة

المهم الانقسام حولها لمؤيدين ومعارضين أيا كانت الأسباب

خلينا من المؤيدين ونروح للمعارضين

المعارضين نفسهم ردود فعلهم اختلفت فيه اللي قال نكمل ونحاول نحل المشكلة وفيه اللي فضل الانسحاب

أنا هنا مش هناقش نوايا الفريق الأول من المعارضين أو الفريق التاني أو حتى نوايا المؤيدين

أو هقول من كان صح ومين كان غلط

أنا عن نفسي من المعارضين وعايزة طوائف تانية من الشعب تمثل بشكل أكبر رغم اني أميل للفكر الاسلامي

ورغم ان الفكر الاسلامي هو اللي يميل ليه أغلب الشعب في مصر

لكن من حق كل فكر في مصر يكون له تمثيل ساعة وضع الدستور

......................................................

نيجي للي أنا عايزة أتكلم فيه وهو

ايه أكتر رد فعل ايجابي - من وجهة نظري - ممكن يتخذه المعارضين

بعد الدستور ده ما تتحط المواد بتعته أكيد هيتعمل استفتاء

قدامنا حاجتين اما الاستمرار في الخطاب المتعالي والاكتفاء بالتوك شو والعالم الافتراضي

أو تصحيح الخطأ اللي حصل في الاستفتاء وفي الانتخابات ويتم النزول للشارع

وده لازم يحصل من دلوقتي بحيث القوى الثورية تقدر تعمل لنفسها قاعدة شعبية

فالناس تعرفهم وتثق فيهم ويكون سهل انهم يقتنعوا برأيهم

........................................................

ان الطرفين (المعارضين والمؤيدين) يقضوها شتيمة في بعض ده تدني في الأداء من الطرفين وبيفقدهم رصيد

أنا أتمنى ان اللجنة تحط دستور كويس نقدر نعيش بيه كذا عقد قدام 

لكن لنفترض انه جدلا لا قدر الله محطوش دستور كويس أو حطوا مواد مش متفقين معاهم عليها

ساعة الاستفتاء هيفوز اللي معاه قاعدة شعبية أكبر

وده حاليا مش في كفة القوى الثورية بل بالعكس ده في كفة الجانب الآخر

...............................................................

لو الأغلبية استجابت لمطالب الناس وعدلت اللجنة خير وبركة

ولو مستجابتش يبقى ما زال في ايدينا طرف قوي في اللعبة

يا نلحق نكسبه يا اما منلومش حد غير نفسنا

الخطأ مش عيب لكن تكرار الخطأ مرة بعد مرة


وننتظر نتيجة مختلفة فده أكبر عيب